Eth Setau Sagèth ei ua trauèssa circulara que comence e acabe en Vielha, damb 103 quilomètres de recorrut e 9.100 mètres de desnivèu acumulat. Trauèsse tres còthi de montanha, plens d’istòria e tradicions. Eth còth de Guèrra, de 2.320 mts. comunique era Val de Toran, autentic paradís de bòsc primari, vals penjades e prigondes gòrges, damb es Lacs de Liat ena zòna nomentada coma “territòri minèr” dera Val d’Aran, pes antiques mines que i auie en tota era zòna. Eth Pòrt de Rius de 2340 mts., antica rota d’amontanhatge e zòna a on se tròben es mès grani lacs d’Aran coma er estanh Mar e Rius, ei per a on passauen es ramats procedenti d’Aragon tàs peisheus aranesi de Colomèrs  e Restanca. Eth Pòrt de Vielha, que damb es sòns 2.470 mts. ei eth punt culminant dera trauèssa, ei un pas naturau cargat d’istòria der Aran e es Pirenèus. Utilizat des de hè sègles pes poblants des vals coma comunicacion e transpòrt de marchandises.

Eth Setau Sagèth ei ua trauèssa de montanha que recor en grana part deth sendèr de gran recorrut GR211 e s’a dessenhat  en basa a 5 etapes de forma que sigue ara man deth màger nombre possible de persones. Eth recorrut va damb era direccion des agulhes deth relòtge en foncion d’un mielhor desvolopament tecnic entar usatgèr. Discor tostemp peth sendèr senhalizat, sense cap de pas de dificultat tecnica, çò que lo hè accessible a tot eth mon que pogue hèr front ath rèpte fisic qu’es etapes compòrten.

Tanben se pòt hèr en 4,3 o 2 etapes, e entad aqueri que non dispausen de sufisents dies se pòt hèr en dues parts :

Vielha-Salardú de 65,5 Km e Salardú-Vielha 37,5 Km. en desparières dates cada tram.